Experiencias
Colle as ondas de Ortegal
Tes diversas praias para surfear en Ortegal; algunhas funcionan con pouco mar, outras con moito. Todos os estados da marea e todas as direccións do vento teñen as súas posibilidades.
Non obstante, a praia de Esteiro, en Mañón, destaca pola súa constancia durante o verán. En Espasante, Ortigueira, hai dúas praias nas que podes surfear: San Antonio, para os días máis tranquilos e A Concha, moi resgardada e aconsellada nos meses de maior temporal. A praia de Fornos, en Cariño, rompe poucas veces ao ano e precisa das ondas dos maiores temporais de inverno.
Consulta a oferta de Ortegal Surf Escola
Cabalga na natureza
Gústanche os animais? as actividades ecuestres? Entón debes coñecer Ortigueira, no corazón da comarca de Ortegal montando a cabalo, é unha das opcións máis orixinais coa que reconectarás contigo mesmo a través da natureza e dos animais.
Hai diferentes vieiros a cabalo, con distintos niveis de dificultade para que todas as persoas visitantes poidan realizalas. Discorren por camiños e sendas, polo interior das fragas, fervenzas e miradoiros, que nos permitirán abraiarnos a cada paso. Muíños restaurados como os de Ponte Noval, que nos falan dun pasado moi presente, no que a xente acudía a eles a moer o gran, obtido das súas terras. Cabalgaremos polas chamadas montañas da néboa na Serra da Capelada e sentirémonos un pouco máis libres ao carón daqueles animais que se crían ceibos e en liberdade nestes recunchos da nosa terra.
Ademáis se prefires disfrutar dunha clase de equitación no propio recinto é outra das oportunidades que tes, xunto con facer unha visita a unha granxa con animais cos que interactuar.
Unha experiencia única e enriquecedora, que fará da túa visita ao Ortegal unha lembranza imborrable.
Consulta as rutas ecuestres na seguinte ligazón: Granxa do Souto
Déixate guiar polas nosas rutas
As empresas locais poderán ofrecerche unha serie de roteiros guiados polo Ortegal, con andainas que transcorran polo litoral ou a través da montaña. Grazas ao apoio de profesionais accederás a datos curiosos sobre o patrimonio cultural material e inmaterial, coñecendo lendas e tradicións do lugar.
Existen paquetes turísticos con visitas a colectivos e sesións didácticas, espazos naturais moi acaídos para a fotografía e outras rutas nas que podes coñecer a historia da comarca e de Galicia, os seus elementos singulares e mesmo identificar algas, aves ou especies arbóreas.
Consulta empresas coas que facer rutas: Roteiros Lexendarios e Singular Traveler
Embárcate nunha aventura
Queres remar en kaiak? Son moi estables e permítenche ir ao teu ritmo. Ou prefires navegar en barco? Agora é a túa oportunidade, en Ortegal tes opcións que se poden adaptar ás túas necesidades.
Varias empresas locais, entre as que destacan Actividades Estaca, Rutas Cedeira e Queres Vela, dedícanse a facer actividades marítimas no territorio. Con anos de experiencia farán da túa visita algo especial: rutas en kaiak na ría do Barqueiro, xeorrutas en barco pola ría de Cedeira ou travesías pola ría de Cariño, son algunhas das opcións propostas.
Visita as súas páxinas web e decide que actividade che apetece máis!